राहुरी वेब प्रतिनिधी,१७ ( शरद पाचारणे ) :- राहुरी तालुक्यातील गोटुंबे आखाडा येथील महादेव टेकडीवर नूतन श्री विठ्ठल-रूख्मिणी मंदिराचे बांधकाम पूर्ण झाले असून, येत्या शनिवार, १९ जुलै ते मंगळवार, २२ जुलै २०२५ दरम्यान मंदिराचा लोकार्पण सोहळा व मूर्ती प्राणप्रतिष्ठा विधी मोठ्या भक्तिभावात साजरा होणार आहे.
सोहळ्याची सुरुवात १९ जुलै रोजी सायंकाळी ५ वाजता भव्य मिरवणुकीने होईल. त्यानंतर रविवार, २० जुलै रोजी विठ्ठल-रूख्मिणी मूर्तीपूजन आणि होमहवनाचा कार्यक्रम आयोजित करण्यात आला आहे.
मुख्य प्राणप्रतिष्ठा व कलशारोहन सोहळा सोमवार, २१ जुलै रोजी सकाळी १० वाजता संपन्न होईल. बालब्रह्मचारी ह.भ.प. महंत रामेश्वर महाराज राऊत (शास्त्रीजी) (अध्यक्ष, श्री सदगुरु पंढरीनाथ महाराज वारकरी शिक्षण संस्था, घोडेगाव) यांच्या पावन हस्ते नवीन मंदिराचे लोकार्पण व मूर्ती प्राणप्रतिष्ठा विधी पार पडेल. यावेळी सर्व ग्रामस्थ आणि मंदिर देवस्थान मंडळ उपस्थित राहणार आहेत.
सोमवारी सायंकाळी ७ ते ९ वाजेपर्यंत ह.भ.प. रामेश्वर महाराज राऊत यांचे जाहीर हरिकिर्तन होईल, त्यानंतर महाप्रसादाचे आयोजन करण्यात आले आहे. या महाप्रसादाचे अन्नदाते डॉ. बाळासाहेब रायभान तोडमल हे आहेत.
मंगळवार, २२ जुलै रोजी प्राणप्रतिष्ठा सोहळ्याची सांगता होईल. या निमित्ताने सकाळी १० ते १२ या वेळेत शब्दप्रभू ह.भ.प. अंकुश महाराज जगताप (नेवासा) यांचे जाहीर हरिकिर्तन आयोजित करण्यात आले आहे. त्यानंतर सर्व ग्रामस्थांच्या वतीने पुन्हा महाप्रसादाचे आयोजन करण्यात आले आहे.
या चार दिवसीय दिव्य आध्यात्मिक कार्यक्रमास उपस्थित राहून भक्तीचा लाभ घेण्याचे आवाहन महादेव युवा मंच व ग्रामस्थांच्या वतीने करण्यात आले आहे.